İlhaq etilgen Qırımda Kremlniñ kontroli altında olğan ükümetniñ reis muavinine qarşı qabaatlav hulâsası mahkemege yollandı. Bunı martnıñ 1 cumaaqşamı kününde QMC Prokuraturasınıñ matbuat hizmeti bildire.
Bildirilgenine köre, qabaatlav aktı, Ukraina Cinaiy kodeksiniñ 111-nci maddesiniñ 1-nci qısmında qayd etilgen cinayetni (devletke hiyanet) işlegeninde qabaatlanuv boyunca, daa soñra Qırımdaki Rusiye informatsiya ve kütleviy kommunikatsiyalar naziri vazifesine tayin etilgen Aqyar şeer şurasınıñ sabıq deputatına qarşı tizildi. Oña qarşı on eki yıldan on beş yılğa qadar azatlıqtan marum etilmesi şeklinde cezalav tayin etile bile.
Bildirüvde: «Cinaiy işniñ tahqiqatı esnasında onıñ, 2014 senesiniñ mart ayından başlap, Qırımnıñ işğaline yardım etkenine ve qol tutqanına dair red etilmez delliller elde etildi. Qabaatlanğan şahıs Rusiye vekillerine, Ukrainağa qarşı ziyankâr faaliyetlerini ömürge keçirmege ve işğalci devletniñ içki siyasetini Qırım territoriyasında tatbiq etip, informatsion tecavuznı teşkil etlmege yardım etti ve yardım etmege devam ete», – denile.
Prokuraturanıñ qayd etkenine köre, şu cümleden, qabaatlanğannıñ vastasız iştiraki ile Qırımdaki Rusiye ükümetiniñ oturışuvları keçe edi. Bu oturışuvlarda ilhaq etilgen yarımadada Rusiyeniñ qanunlarına muvafıq olaraq normalar ve standartlarnıñ tatbiq etilmelerine dair qararlar alına edi.
2014 senesiniñ martında Qırımdaki Rusiye informatsiya ve kütleviy kommunikatsiyalar naziri vazifesine Dmitriy Polonskiy tayin etildi. 2014 senesiniñ oktâbrinde onı Qırımdaki Rusiye ukümetiniñ reis muavini vazifesine tayin ettiler.
Polonskiy özü, cinaiy işi boyunca qabaatlavnıñ mahkemege teslim etilmesine dair QMC Prokuraturasınıñ bildirüvini iza etmedi.
