Ukraina siyasetşınası Oleg Saakân, Rusiye ükümeti ilhaq etilgen Qırımda Rusiye bölgeleriniñ sakinlerini davet etüv yolunen planlı surette yerli ealiniñ deñiştirüvni ömürge keçire, dep saya. Bu fikirni o, martnıñ 2-sinde Qırım.Aqiqat Radiosı efirinde emek migrantlarınıñ Yalta polis memurına ucümini izaat eterken bildirdi.
Siyasetşınas: «Ukraina devletinde çoq yıl yaşağan Qırım sakinleri içün emek migratsiyası ve milletlerara munasebetleri esasındaki çatışmalar belli derecede añlaşılmağan şeylerdir… Teessüf ki, Qırım Rusiyeniñ kontroli altında daa qalsa, olar daa da keskinleşecek. Moskva, yerli ealini işsizlik vastasınen yarımadadan ketmege mecbur etip ve yarımadağa Rusiye bölgeleriniñ sakinlerini çağırıp, planlı surette yerli ealiniñ deñiştirilmesini ömürge keçire. Neticede Qırım sakinleriniñ nisbiy sayısı kettikçe ep azlaşa», – dep qayd etti.
Daa evel Lipetskten kelgen emek migrantları Yaltadaki Federal migratsion hizmetiniñ başlığını kötekledi. Bunı, şeer polisindeki menbalarından naqil etip, «Primeçaniya» neşiri bildirdi. Ucüm etkenler yaqalandı. Şimdi tahqiqat işleri alıp barıla.
Bu, Qırımnıñ Cenübiy yalısında polis hadimlerine yapılğan birinci ucüm degil. Bundan evel Aluştada belli olmağan şahıslar Rusiye Tahqiqat komitetiniñ şeer idaresi başlığı Konstantin Girâkovnı köteklediler.
