Kremlniñ kontroli altında bulunğan Aqmescitteki Merkeziy rayon mahkemesi martnıñ 2-sinde «26 fevral işi»niñ eki figurantı Ali Asanov ve Mustafa Degermencige ev apisi şeklindeki sıñırlav tedbiriniñ muddetini mayısnıñ 7-sine qadar uzattı. Bunı Qırım.Aqiqatqa advokat Ayder Azamatov bildirdi.
Azamatov: «Bugün qabaatlav tarafı qabaatlavlarına ilâveler qoştı. Prokuror vesiqalarnı taqdim etmekni bitirgen soñ Ali Asanov ve Mustafa Degermencige ev apisi altında bulunuv şeklinde sıñırlav tedbiriniñ uzatılmasını istep muracaat etti. Qorçalav tarafı sıñırlav tedbiri boyunca öz fikrini bildirdi: ya sıñırlav tedbirini deñiştirmeli, ya da tıbbiy teşkerüv içün qoşumça vaqıt berilmelidir. Lâkin mahkeme daa evelki sıñırlav tedbirini aynı şartlar ile mayısnıñ 7-sine qadar qaldırdı», – dedi.
Advokatnıñ aytqanına köre, bundan evelki sıñırlav tedbiriniñ muddeti aprelniñ 7-sinde soñuna yetkenine baqmadan Rusiye prokurorı, «mahkeme ceryanı bitecegi sebebinden soñundan bunıñ içün vaqıt olmaycaq», dep, onıñ daa evel uzatılmasını istedi.
Nevbetteki mahkeme oturışuvı martnıñ 15-nde yerli vaqıt boyunca saat 13:00-de başlaycaq.
2015 senesinde, Qırım Yuqarı Radası binasınıñ divarları yanında 2014 senesi fevral 26-da Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün bir grup qırımtatar faaliyetçilerine qarşı mahkeme başlandı. Olar kütleviy qarışıqlıqlarda iştirak etkenlerinde qabaatlanalar.
Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
2017 senesi oktâbrniñ 25-nde Rusiye akimiyeti Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umeriv ve Çiygoz Kyivge keldiler.
