Herson vilâyetinde ava vaziyeti fenalaşqanına baqmadan, Qırım memuriy sıñırındaki kiriş çıqış kontrol noqtaları er zamanki kibi çalışmağa devam etti. Bu aqta Qırım.Aqiqatqa Ukraina Devlet sıñır hızmetiniñ hadimi Maksim Soroka ikâye etip berdi.
Onıñ sözlerine köre, bu arada memuriy sıñırdan keçken yolcu ve naqliyat aqışı azalğan, ancaq KÇKN er zaman olğanı kibi çalışmağa devam ete, menfiy adiseler yoq eken.
Bir kün evel ukrain Gidrometmerkezi, fevralniñ 28-nde Ukrainanıñ cenübiy, şarqiy ve merkeziy vilâyetleriniñ ekseriyetinde saniye 15-20 metr tezliginde şiddetli el esmesi beklengeni aqqında tenbiyelegen edi. Herson vilâyetinde kündüz – küçlü qar yağışı ve furtuna beklenmekte.
Fevralniñ 27-nde Herson vilâyetiniñ memuriyeti, Geniçesk rayonınıñ Arabat beliniñ yolu yuvulıp ketkeni ve küçlü el eskeninden dolayı, suvnıñ yüklsekligi 40 cm etkeni aqqında haber etken edi.
Bundan evel, fevralniñ 27-nde qopqan furtuna sebebinden Arabat belinde ilhaq etilgen Qırımnen sıñırdaş olğan Strelkovoye köyünen Ukrainanıñ qıta qısmı arasındaki alâqa kesilgen edi.
Qırım Rusiye tarafından ilhaq etilgen soñ, 2014 senesi Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.
