Kreml nezareti altındaki Qırım ükümeti yarımadanıñ energiyasını bloklağanı sebebinden Ukrainağa qarşı dava azırlay. Bu aqta RİA Novostige Qırımnıñ rusiyeli ükümetine bağlı halqara aq-uquq meseleleri boyunca ekspert merkeziniñ reberi Aleksandr Molohov ikâye etip berdi.
«Biz bayağı bir dava azırlaymız, çünki blackout neticesinde bayağı bir insan zarar kördi. Bizim salmaqlı müsterilerimiz arasında elektrik kesilgeni sebebinden mahsulatı bozulğan Aluşta süt zavodı da bar. Biz miqyaslı uquqiy ücüm azırlaymız», – dedi Molohov.
Haber derc etilgen vaqıtqace Qırım ükümetiniñ saytında dava berilecegine dair iç bir malümat yoq.
2015 senesi dekabr ayından itibaren Herson vilâyetinde elektrik direkleri zarar körgeninden dolayı Qırımğa Ukrainanıñ qıta qısmından elektrik berülüvi kesilgen edi. Şimdi Qırım elektrikni özü çıqarğan, qomşu Rusiyeden ketirilgen generatorlar ve Rusiyeniñ Kuban bölgesinden çektirilgen elektrik köpür vastasınen teminley.
