Kreml nezareti altındaki Aqmescit Merkeziy rayon mahkemesi «26 fevral işi»niñ oturışuvını Arsen Yunusovnıñ advokatı kelmegeni sebebinden martnıñ 2-sine avuştırdı, dep haber Qırım.Aqiqatnıñ muhbiri.
Ayrıca mahkeme oturışuvında, martnıñ 1-nde Qırım Yuqarı mahkemesinde «26 fevral işi»niñ iştirakçileri Ali Asanov ve Mustafa Degermenciniñ areketlerini sıñırlav boyunca bergen şikâyetleri baqılacaq eken.
2015 senesinde bir gruppa qırımtatar faallerine qarşı, 2014 senesi fevralniñ 26-sında Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün mahkeme başlatıldı. Olar kütleviy nizamsızlıqlarda iştirak etkenlerinde qabaatlandı.
Daa soñra mahkeme «Fevral 26 işi»ni ekige ayırdı: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.
