Qırımnıñ rusiyeli ükümeti 2014 senesi fevralniñ 26-nda Aqmescitte keçken miting ve çarpısuvlar etrafında añlı olaraq er türlü efsane uydurmaqnen oğraşalar, dep saya rusiyeli advokat Nikolay Polozov. Bu firirinen o fevralniñ 26-nda Qırım.Aqiqat Radiosınıñ efirinde paylâştı.
«İç bir türlü añlaşma yapılmaycağını, Ukraina ve qırımtatarlar Qırım işğalini iç bir vaqıt qabul etmeycekleri añlaşılğan soñ, rusiyeli ükümet intiqam olaraq cinaiy işler açmağa başlap, (fevralniñ 26-ndaki vaqialar boyunca –QA) mesüliyetke hususan tek qırımtatarlarnı çekip başladı. Albuki mitingte çeşit millet vekili olğan Ukraina vatandaşları da olğanına ve olar da zarar körgenine baqmadan, kimse bunı esapqa almadı. Ancaq ta fevralniñ 25-nde Qırım Yuqarı Şurasını zapt etip almağa istegen yalıñız Sergey Aksönovnıñ boyeviklerini zarar kördi dep tanıldı. Böyle bir efaseneler olarnı qaraman etip köstere», – dep qayd etti advokat.
Ukrainada fevralniñ 26-sı «Qırımnıñ Rusiye işğaline qarşı tirenüv künü» olaraq qayd etilmesi teklif etile. 2014 senesi bu künü Qırım Yuqarı Şurasınıñ binası ögünde Ukraina torpaq bütünligine bağışlanğan miting ötkerilgen edi. O zaman miting iştirakçilerine Rusiye tarafdarı olğan «Rus birligi» firqasınıñ vekilleri qarşı çıqqan edi. Bu çarpışuv neticesinde eki kişi elâk oldı.2018 senesi Kreml nezaretindeki Qırım ükümeti o künki çarpışmada ezilip ölgen Rusiye tarafdarları Valentina Korneva ve İgor Postnıyni ölüminden soñ medallernen taqdirledi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
