2014 senesi fevralniñ 26-nda keçken miting ve Qırım cemaatçılıqnıñ faalligi Rusiyege «yarımadanıñ göñülli olaraq qoşuldı» deycek bir körüniş yaratmasına fursat bermedi, dep saya Qırımtatar Milliy Meclisiniñ reisi Refat Çubarov. Bu fikirni o Qırım.Aqiqat Radiosı efirinde beyan etti.
«Meclisniñ çağıruvından soñ mitingke qırımtatarlardan ğayrı, ukrainler ve başqa millet vekilleri de çıqqan edi. Biz Vladimir Putin, FSB ve umumen Rusiyege, Qırım Yuqarı Şurası göñülli olaraq toplanıp, yarımadanıñ Ukrainadan ayırılıp Rusiyege qoşulacağına özü qarar berdi deycek bir körüniş yaratmağa fursat bermedik. Cemaatçılıq Qırım sakinleriniñ özleri ilhaq etilgenini istediler dep dünyani işandıracaq gibrid bir resim sızmağa izin bermedi», – dep qayd etti Meclis yolbaşçısı.
Ukrainada fevralniñ 26-sı «Qırımnıñ Rusiye işğaline qarşı tirenüv künü» olaraq qayd etilmesi teklif etile. 2014 senesi bu künü Qırım Yuqarı Şurasınıñ binası ögünde Ukraina torpaq bütünligine bağışlanğan miting ötkerilgen edi. O zaman miting iştirakçilerine Rusiye tarafdarı olğan faaller, şu cümleden Qırımnıñ al-azırdaki yolbaşçısı Sergey Aksönov reberligi altında «Rus birligi» firqasınıñ vekilleri qarşı çıqqan edi.
Ekinci kün saba üzerinde iç bir işareti olmağan arbiyler Qırımnıñ ükümetiniñ müessiselerini zapt etip alğan edi, yerli parlament deputatları ise uydurma referendum keçirilmesi içün rey bergen ediler.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
