Qırımtatarlarnıñ lideri, Ukraina halq deputatı Mustafa Cemilev yarımada azat etilmegence Kyivniñ, Qırım ükümeti qurması manasız dep saya. Bu aqta Cemilev fevralniñ 26-nda 5 Kanal, Qırım.Aqiqat, QHA (Qırım haber ajansı) ve Radio Hayatnıñ ötkergen – «4 yıllıq tirenüv» adlı ortaq marafon efirinde beyan etti.
«Ukraina (yarımada – QA) azat etilmeden teşkil etmesi uyğun olmağan şeyler bar. Meselâ, Qırımnı temsil etecek deputatlar o yerde saylânmaq kerek. Qırım MC ya da Qırım muhtariyetiniñ ükümeti de tizilmez, çünki onı parlament deputatları tize. Onıñ içün Qırım tışında er angi bir ükümet aqqında şimdi laf etmege sıra kelmey», – dep saya Cemilev.
Onıñ sözlerine köre, Qırım tışında hususan Qırım MC prokuraturası, Qırım MC ve Aqyardaki Ukraina Milliy politsiyasınıñ baş idaresi, Ukraina prezidentiniñ Qırım MC temsilciligi çalışa.
2017 senesi dekabrniñ 22-nde Ukraina baş naziri Volodımır Groysman, al-azırda Ukraina qıta qısmında Qırım Muhtar Cumhuriyeti ükümetiniñ qurulması mantıqsız dep aytqan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
