Resmiy Berlin Qırımnıñ Rusiye tarafından ilhaq etilgenini tanımay, çünki bu halqara uquqqa zıt kele, dep haber ete fevralniñ 26-nda Ukrainadaki Almaniya elçihanesi Twitterde.
«Almaniyanıñ pozitsiyası olğanı kibi, şimdi ve kelecekte de aynı olıp qalacaq yani: Qırım- Ukraina toprağı. Almaniya Qırımnıñ Rusiye tarafından ilhaq etilgenini tanımay, çünki bu halqara uquqqa zıt kele», – denilmekte haberde.
Fevralniñ 26-nda Ukraina ile bütün dünyada qırımlılarğa qol tutmaq maqsadınen devletniñ topraq bütünliginen bağlı aktsiya, muzakere, forum, miring ve yürüşler keçirile.
Ukrainada fevralniñ 26-sı kününi «Qırımnıñ Rusiye işğaline qarşı tirenüv künü» olaraq qayd etilmesi teklif etile. 2014 senesi bu künü Qırım Yuqarı Şurasınıñ binası ögünde Ukraina torpaq bütünligine bağışlanğan miting ötkerilgen edi. O zaman miting iştirakçilerine Rusiye tarafdarı olğan faaller, şu cümleden «Rus birligi» firqasınıñ vekilleri qarşı çıqqan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
