ABD Ukrainadaki elçihanesi, Qırımnıñ ilhaqını ömürlik tanılmaycağı ve Ukraina suverenitetinen, topraq bütünligine er vaqıt qol tutalacağı aqqında beyan ete.
«Dört yıl evelsi bu künü (fevralnin 26-nda – QA) Rusiye Qırımdaki Ukraina parlamentini zapt etti. Biz Qırımnıñ qanunsız ilhaqını ömürlik tanımammız ve sarsılmadan Ukrainanıñ suverenitetinen, topraq bütünligine er vaqıt qol tutarmız», – denilmekte elçhaneniñ Twitterdeki haberinde.
Diplomatik temsilcilik «Qırım – Ukraina toprağı» olğanını qayd etti.
Ukrainada fevralniñ 26-sı kününi «Qırımnıñ Rusiye işğaline qarşı tirenüv künü» olaraq qayd etilmesi teklif etile. 2014 senesi bu künü Qırım Yuqarı Şurasınıñ binası ögünde Ukraina torpaq bütünligine bağışlanğan miting ötkerilgen edi. O zaman miting iştirakçilerine Rusiye tarafdarı olğan faaller, şu cümleden «Rus birligi» firqasınıñ vekilleri qarşı çıqqan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
