Ukraina halq deputatı, Qırımtatar Milliy Meclisiniñ reisi Refat Çubarov, Qırımnıñ azat etilmesi içün halqara sanktsiyalar yetersiz dep saya. Bu aqta Çubarov «Zapt etilgen yarımada: 4 yıllıq tirenüv» adlı halqara forum çerçivesinde söz yürsetti, dep haber ete Qırım.Aqiqat muhbiri.
«Rusiyeniñ Ukrainağa qarşı yapqan tecavuzını toqtatmaq içün, oña qarşı kirsetilgen sanktsiyalar yetersiz. Onıñ içün biz dünya ükümetleriniñ esas bir vazifesi, daa doğrusı olardan rica etilecek bir şey olaraq – Rusiyege qarşı sistematik basqı yapğanlarıdır, dep köremiz», – dedi Çubarov.
Fevralniñ 26-nda Kyivde «Zapt etilgen yarımada: dört yıllıq tirenüv» adlı dördünci halqara forum ötkerile.
Ukrainada fevralniñ 26-sı kününi «Qırımnıñ Rusiye işğaline qarşı tirenüv künü» olaraq qayd etilmesi teklif etile. 2014 senesi bu künü Qırım Yuqarı Şurasınıñ binası ögünde Ukraina torpaq bütünligine bağışlanğan miting ötkerilgen edi. O zaman miting iştirakçilerine Rusiye tarafdarı olğan faaller, şu cümleden «Rus birligi» firqasınıñ vekilleri qarşı çıqqan edi.
Fevralniñ 26-nda Ukraina ile bütün dünyada qırımlılarğa qol tutmaq maqsadınen devletniñ topraq bütünliginen bağlı aktsiya, muzakere, forum, miring ve yürüşler keçirile.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
