Ukrainanıñ baş naziri Volodımır Groysman «Qırımnıñ Rusiye işğaline qarşı tirenüv kününde», fevralniñ 26-sında keçken vaqialar, Qırım sakinleriniñ ömürini «evel» ve «soñra» degen sözlernen ayırğanını beyan etti.
«Dört yıl evel Qırım yarımadası rusiyeli ordu tarafından işğal etilip başladı. Bu kün Qırım sakinleriniñ ömürini «evel» ve «soñra» degen sözlernen ayırdı. Biñlernen İnsanlar evlerini terk etmege mecbur qaldılar, çünki Qırımnı başqa bir devletniñ bayrağı altında körmege istemey ediler», – denilmekte baş nazirniñ Facebooktaki haberinde.
Groysman, «Qırım üzerinde kene de Ukraina bağrağını kötermek içün» Ukraina dört yıldan berli küreş alıp barğanını qayd etti.
«Bizler maqsadımızğa yetmegence toqtamaycaqmız! Qırım – Ukraina toprağı!» – dep ilâve etti Nazirler Şurasınıñ yolbaşçısı.
Ukrainada fevralniñ 26-sı kününi «Qırımnıñ Rusiye işğaline qarşı tirenüv künü» olaraq qayd etilmesi teklif etile. 2014 senesi bu künü Qırım Yuqarı Şurasınıñ binası ögünde Ukraina torpaq bütünligine bağışlanğan miting ötkerilgen edi. O zaman miting iştirakçilerine Rusiye tarafdarı olğan faaller, şu cümleden «Rus birligi» firqasınıñ vekilleri qarşı çıqqan edi.
Fevralniñ 26-nda Ukraina ile bütün dünyada qırımlılarğa qol tutmaq maqsadınen devletniñ topraq bütünliginen bağlı aktsiya, muzakere, forum, miring ve yürüşler keçirile.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
