Ukrainanıñ Avropa Şurasındaki daimiy temsilcisi Dmıtro Kuleba, ilhaq etilgen Qırımda keçirilecek Rusiye prezidentiniñ saylâvları halqara cemaatçılıq tarafından tanılmaycaq dep saya. Bu aqta Kuleba «112 Ukraina» televizion kanalınıñ efirinde ayttı.
«Ukrain diplomatiyası kanalından artıq kerek avalelerniñ episi yollanıldı, şu cümleden, men Strasburg elçisi olaraq, Qırımda keçecek saylâvlarnı kimse tanımaması ve olar qanuniy dep sayılmaması içün atılacaq adımlarğa dair soylârını teslim aldım», – dedi Kuleba.
Bu arada bu saylâvlarnıñ tanılmasınen bağlı qararnı er bir devletniñ özü qabul etecek.
«Putinniñ umumen qanunsız dep tanıycaqlarından şübelenem, ancaq men Qırımdaki saylâvlar halqara cemaatçılıq tarafından iç bir şekilde tanılmaycağına dair aktsentler yapılacağından kesen-kes eminim», – dedi Ukrainanıñ Avropa Şurasındaki daimiy temsilcisi.
Rusiye prezidentiniñ saylâvları 2018 senesi martnıñ 18-ne – yani Qırım Rusiye tarafından ilhaq etilgen künge tayin etildi. Saylâvlarda: Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy olaraq, sekiz namzet iştirak etecek.
Fevralniñ 16-nda Ukraina prezidenti Petro Poroşenko dünya cemaatçılığını ilhaq etilgen Qırımda keçirilecek Rusiye prezidenti saylâvlarınıñ neticesini tanımamağa çağırdı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
