Fevralniñ 26-nda Kyivde «İşğal etilgen yarımada: dört yıllıq tirenüv» adlı dörtünci halqara forum keçirilmesi planlaştırıla, dep haber ete fevralniñ 25-nde Yuqarı Rada matbuat hızmeti Twitterde.
Haber etilgenine köre, tedbirde Ukraina Yuqarı Radası reisiniñ birinci muavini İrina Geraşçenko, Avropa parlamentiniñ deputatı Rebecca Harms, Ukraina halq deputatları, Ukraina ükümeti ve Qırımtatar Milliy Meclisiniñ temsilcileri iştirak etecek.
Üç çeşit panel munaqaşası keçirilüvi qararlaştırğan forum çerçivesinde, «Kreml esirleri» adlı vesiqalı film numayiş etilecek.
2017 senesi fevralniñ 25-26-nda Ukraina nazirler Şurası klubında ötkerilgen «Qırım işğal şartlarında: Bunıñ Ukraina ve dünya içün aqibetleri» adlı halqara forumda, ukrain siayasetçileri ve ükümet azaları, çetel diplomatları ve halqara ekspertler iştirak etken ediler.
Ukrainada fevralniñ 26-sını «Qırımnıñ Rusiye işğaline qarşı tirenüv künü» olaraq ilân etmege teklif etile. 2014 senesi aynı künü Qırım Yuqarı Şurasınıñ binası ögünde Ukrainanıñ topraq bütünligine bağışlanğan miting ötkerilgen edi. O zaman miting iştirakçilerine Rusiye tarafdarı olğan faaller, şu cümleden «Rus birligi» firqasınıñ vekilleri qarşı çıqqan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
