Fevralniñ 24-nde qırımtatar faali Giray Kulametovnıñ anası Zarema Kulametova 2018 senesi yanvar ayında rusiyeli politsiya hadimini aqaretlegeninde qabaatlay.
Qırım.Aqiqat muhbiri haber etkenine binaen, Kulametova Rusiye Cinayet kodeksiniñ 319 maddesi («Akimiyet temsilcisini aqaretlev») boyunca qabaatlanmaqta.
Kulametovanıñ areketlerinden, Qırım ilhaqından evel, Odessa vilâyeti Kiliya rayonı militsiya bölüginde yolbaşçılıq yapqan Seitler rayonı (Nijnegorskiy) ROVD vazifesini vaqtınca eda etken İgor Ganja zarar körgen emiş.
Fevralniñ 24-nde politsiya bölügini ziyaret etkende Kulametova bir şey itiraf etmekni red etip, öz tariflerini yazuvlı şekilde taqdim etken. Haber etilgenine köre, qırımtatar faaliniñ anası politsita bölügini artıq üçünci sefer ziyaret ete eken.
«Politsiya hadimleriniñ sözlerine köre, (Kulametovanıñ - QA) qabaatlı olğanını videoqayd kameralarından alınğan çekimler ve şaatlar isbat etecek eken. Men bellesem, olarnıñ adları yaqın künlerde iş materiallarınen tanışqan arada belli olur. Taqiqat işleri bitti. Artıq bu iş materialları prokuraturağa, ondan soñ mahkemege berilecek», – dep ikâye etti Qırım.Aqiqatqa uquimayecisi Mustafa Seydaliyev.
Yanvarniñ 18-nde Kreml nezareti altındaki İslâm-Terek (Kirovskoye) rayon mahkemesi, yanvarniñ 18-nde evinde tintüv yapqan soñ qırımtatar faali Giray Kulametovnı tutup alaraq, Rusiyeniñ memuriy uquq bozuvları aqqında kodeksiniñ 20.3 maddesi (1-nci qısmı) boyunca qabaatlağan edi. Mahkeme «2012 senesinde videorolikni derc etken içün» Kulambetovğa 10 künlük apis cezanı tayin etken edi.
Daa soñra, qırımtatar faali Giray Kulametovnıñ anası Zarema Kulametova qabaatlav aktı taqdim etilmek ve sorğulanmaq içün, rusiyeli politsityanıñ İslâm-Terek (Kirovskiy) rayon bölügine çağırılğan edi.
Açıq menbalarda politsiyanıñ bu hususnen bağlı iç bir izaatı yoq.
İlhaqtan soñ Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirilmege başladı.
