Rusiye prezidenti Vladimir Putin Qırımnı ilhaq etip, qırımtatar halqını repressiyalarğa oğratqan soñ, natsist rejiminiñ yolundan kete, dep beyan etti Qırım.Aqiqat Radiosı efirinde tatar uquimayecisi, Rusiyede Qırım ilhaqını tanımağanı içün ilk olaraq mahküm etilgen Bütüntatar cemaat merkezi prezidiumınıñ azası Rafis Kaşapov.
«Qırımnı qorçalap aktsiya keçirgen tek men degil edim, ama 280 madde boyunca (Rusiye Cinaiy Kodeksiniñ 280.1 maddesi - Rusiyeniñ topraq bütünligini bozmaq çağıruvları – QA) ilk mahküm etilgen birinci insan oldım. Men aqiqaten de, Rusiye prezidenti Vladimir Putin Adolf Hitlerniñ yolunu devam etkeni içün takbih ve iddia etem. Rusiye Qırımnı ilhaq etken soñ, Qırımtatar milliy Meclisiniñ bütün bina, kitapları çekilip alındı, qırımtatar mektep, cami, gazeta ve radiolarını qapatıldı. Ondan soñ Qırım musulmanlarına qarşı şiddetli areketler yapılıp başlandı», – dedi Kaşapov.
Tatar uquimayecisi Rafis Kaşapovnıñ tolu intervyusını yaqın künlerde Qırım.Aqiqat saytında oquñız.
2015 senesi sentâbr ayında rusiyeli Tatar cemaat merkeziniñ yolbaşçısı Rafis Kaşapov, Qırımnıñ ilhaqını tenqit etip, separatizmge çağıruv yapqanında qabaatlanıp, üç yıl apıs cezasına mahküm etildi. Kaşapov İnsan aqları Avropa mahkemesi şikâyet etken edi. Kaşapov 2017 senesi dekabrniñ 26-nda azat etildi.
2018 senesi fevral ayında Rafis Kaşapov Rusiyeni terk etti.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
