Qırımtatar faali Giray Kulametovnıñ anası Zarema Kulametova fevralniñ 24-nde qabaatlav aktı taqdim etilmek ve sorğulanmaq içün rusiyeli politsityanıñ İslâm-Terek (Kirovskiy) rayon bölügine çağırıldı. Bu aqta Qırım.Aqiqatqa Azatlıq Radiosınıñ muhbiri haber etmekte.
Fevral ayınıñ başında politsiya hadimini aqaretlegeni içün çağırğan ediler.
Açıq menbalarda politsiyanıñ bu hususnen bağlı iç bir izaatı yoq.
Qırımtatar faali Giray Kulametov yanvarniñ 28-nde, 2012 senesi ictimaiy ağlarda vidorolik derc etkeni sebebinden on kün apiste tutlğan soñ, Qarasuvbazar muvaqqat izolâtorından çıqqan edi.
Kreml nezareti altındaki İslâm Terek (Kirovskiy) rayon mahkemesi yanvarniñ 18-nde evinde tintüv yapılğan soñ, Eski Qırımda tutulıp alınğan Giray Kulametovnıñ işini baqqan edi. Kulametov «ekstremistik teşkilâtlarnıñ sıfatları ve timsallerini teşviq etüv»de qabaatlanğan edi.
İlhaqtan soñ Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirilmege başladı.
