Rusiye ve ilhaq etilgen Qırımda yasaqlanğan «Tebliğ Cemaatı» teşkilâtında iştirak etüvde qabaatlanğan Arsen Kubedinov ev apisinde qalmaq şartınen Taqiqat izolâtorından çıqarıldı. Bu aqta fevralniñ 24-nde «Qırım birdemligi» oturışuvında, onıñ advokatı Cemil Temişev ikâye etti, dep haber ete Qırım.Aqiqatqa Azatlıq Radiosınıñ muhbiri.
Advokat ayrıca, onıñ imayesi altındaki şahıs iç bir şeyni itiraf etmegenini qayd ete.
Oktâbrniñ 2-nde Qırımdaki Rusiye FSB idaresi, «Tebliğ Cemaatı» islâm teşkilâtınıñ üç üceyresi yoq etilgeni aqqında esabat bergen edi.
Kreml nezaretindeki Aqmescitniñ Kiyev rayon mahkemesi oktâbrniñ 3-nde «Tebliğ Cemaatı» teşkilâtda iştirak etkenlerinde qabaatlap, üç Qırım sakini - Renat Suleymanov, Arsen Kubedinov ve Talât Abdurahmanovnı apiske qapatqan edi.
Qırım yarımadası Rusiye tarafından ilhaq etilgen soñ, yarımadada FSB tarafından muntazam surette jurnalistler, failler, cemaatçılar tintile ve sorğuğa çekile. Uquqimayecileri bunı farqlı tüşüngenlerge saip olğanlarğa qarşı küreş dep tanıy.
«Tebliğ Cemaatı» – siyasetten çette turğan diniy areket. 1926 senesi İndistanda Mevlâna Muhammed İlyas tarafından tesis etilgen edi. Areketniñ esas maqsadı – islâmda keniş eali arasında maneviy deñişmeler yapmaq ve içtimaiy ya da iqtisadiy vaziyetine baqmadan, bütün musulmanlarğa hitap etmekten ibaret. 2009 senesi Rusiye Yuqarı mahkemesi bu teşkilâtnı ekstremistik dep tanıyaraq, faaliyetini yasaqlağan edi.
