İsveçiya askerleri, parlement vekillerine muracaat etip, memleketniñ mudafaasına ayırılacaq sermiyanı arttırmağa rica ete, çünki Rusiye tarafından telüke arta.
Fevralniñ 23-nde parlamentke berilgen bu mevzudaki muracaatta arbiyler, İsveçiya er senelik mudafaa masraflarını, şimdiki 50 milliard kronadan ziyade, 2035 senesine doğru 115 milliard isveç krona (14 milliard dollar) miqdarına qadar arttırmaq kerek olğanını beyan ete.
Arbiy yolbaşçılar, asker sayısını da, ekilep, tahminen 120 biñ nefer insanğa qadar arttırmağa teklif eteler.
Maruzada aytıla ki, masraflarnıñ arttırılması – Moskvanıñ tecavuziy tışqı siyaseti sebebinden kereklidir.
Maruzada: «Rusiye 2008 senesi Gürcistanda, ve 2014 senesi Qırımda ve Ukrainanıñ şarqında yapqan areketlerinen Rusiye kösterdi ki, öz siyasiy maqsatları içün, bocalamayıp, arbiy quvvetini qullana bile», – dep aytıla.
İsveçiya NATO azası degildir, lâkin aza olğan devletlernen birlikte arbiy talimatlarda iştirak ete.
İsveçiya arbiyleriniñ muracaatı, devletniñ Telükesizlik hızmeti ihtar bildirilgeninden bir kün soñra derc etilgen edi. Sentâbrde ötkerilecek umumiy saylavlağa Moskvanıñ kirişe bilecegi, «telükesizlikniñ eñ büyük havfı Rusiyeniñ casuslığı olğanı» ihbar etilgen.
