Fevralniñ 23-nde Herson vilâyetiniñ Geniçesk rayonında XX asır başında qırımtatar milliy areketiniñ lideri olğan Noman Çelebicihan añıldı.
Qırımtatar Milliy Meclisiniñ azası Gülnara Bekirova Qırım.Aqiqatqa ikâye etip bergenine köre, regionnıñ bir qaç qasabasında hatıra aqşamları, qırımtatar milliy «Küreşi» boyunca nümüneviy çıqışlar, umumtasil oquv ve medeniyet müessiselerinde vatanperverlik dersleri ötkerilgen, sergi ve ekspozitsiyalar teşkil etilgen.
Bekirova ayrıca, tedbirlerniñ teşkilâtçısı yerli devlet memuriyetleri ve qırımtatar meclisler olğanını qayd etti.
Daa evel haber etilgenine köre, Noman Çelebicihanğa bağışlanğan tedbirler Ukrainanıñ çeşit regionlarında, şu cümleden Rusiye ilhaq etken Qırımda da öterildi.
2018 senesi fevralniñ 23-nde XX asır başında qırımtatar milliy areketiniñ lideri olğan, belli erbap Noman Çelebicihannıñ facialı ölümine 100 yıl tola.
Noman Çelebicihan (1885-1918) – qırımtatar yazıcısı, qırımtatarlarnıñ milliy gimniniñ muellifi, 1917-1918 seneleri qurulğan qırımtatar halqı birinci Qurultaynıñ esasçısı olğan diniy, cemaat ve siyasiy erbabıdır.
Noman Çelebicihan 1885 senesi molla qorantasında doğa. Bağçasaray, İstanbul, Sankt-Peterburgda oquy, qırımtatar yaşlarınıñ maarif ve inqilâbiy teşkilâtlarında iştirak ete. XX-ncı asırnıñ başında eñ istidatlı qırımtatar edebiyatçısı olaraq tanıla. Qırımtatarlarnıñ «Ant etkenmen!» adlı milliy gimniniñ müellifi ola. 1917 senesi Fevral inqilâbından soñ Musulman icra komitetiniñ reisi, Qırım müftisi – soñra ise, Birinci Qırımtatar Milliy Qurultayınıñ reisi olaraq saylâna. 1918 senesi yanvar ayında bolşevikler tarafından tevqif etilerek, fevralniñ23-nde Aqyar apishanesinde deñizciler tarafından öldürile. 33 yaşında olğan müftiniñ cesedi deñizge atıla.
