Fevralniñ 23-nde Kyivde qırımtatar ananeviy küreşi boyunca turnir keçirile. Musabaqa qırımtatarlarnıñ ictimaiy ve siyasiy lideri Noman Çelebicihannıñ hatırasına bağışlanmaqta. Yarışuvda Qırım, Herson vilâyeti ve Kyivden kelgen 100ge yaqın insan (arasında qırımtatarları ve ukrainler bar) iştirak etecek.
Musabaqa ötkerilgen yerden yani – Kiyv politehbka institutından -Qırım.Aqiqatqa bu aqta qırımlı jurnalist Şevket Namatullayev ikâye etip berdi.
«Küreşniñ bu çeşiti meşur olıp başladı. Mında küreşniñ başqa çeşitlerinen oğraşqan sportçılar iştirak etkenini ve meraqlanğanlarını körem. Olar içün busportnıñ yañı çeşiti sayıla, amma becerip olğanlarını körüne. Küreş – bir küreştir, qaydeleri biraz farq ete, ancaq sportçılar küreşçi urbasını kiyip, milliy quşaqnı bağlay ve men, başqa küreş çeşitinen oğraşqan birisi de bügün mükâfat alır dep ümit etem», – dep ikâye etti Namatullayev.
Musabaqa ğalibleri medal ve yarlıqlardan ğayrı, ananeviy mükâfat sayılğan - bir qoyun da alır.
Qırımdan kelgen sporçılarğa qol tutmaq içün qırımtatyar milliy areketiniñ veteranları da keldi. Zalda Cuma namazı keçirerek, turnir iştirakçileri Noman Çelebicihannı añacaqlar.
2018 senesi fevralniñ 23-nde XX asır başında qırımtatar milliy areketiniñ lideri olğan, belli erbap Noman Çelebicihannıñ facialı ölümine 100 yıl tola.
Noman Çelebicihan (1885-1918) – qırımtatar yazıcısı, qırımtatarlarnıñ milliy gimniniñ muellifi, 1917-1918 seneleri qurulğan qırımtatar halqı birinci Qurultaynıñ esasçısı olğan diniy, cemaat ve siyasiy erbabıdır.
Noman Çelebicihan 1885 senesi molla qorantasında doğa. Bağçasaray, İstanbul, Sankt-Peterburgda oquy, qırımtatar yaşlarınıñ maarif ve inqilâbiy teşkilâtlarında iştirak ete. XX-ncı asırnıñ başında eñ istidatlı qırımtatar edebiyatçısı olaraq tanıla. Qırımtatarlarnıñ «Ant etkenmen!» adlı milliy gimniniñ müellifi ola. 1917 senesi Fevral inqilâbından soñ Musulman icra komitetiniñ reisi, Qırım müftisi – soñra ise, Birinci Qırımtatar Milliy Qurultayınıñ reisi olaraq saylâna. 1918 senesi yanvar ayında bolşevikler tarafından tevqif etilerek, fevralniñ23-nde Aqyar apishanesinde deñizciler tarafından öldürile. 33 yaşında olğan müftiniñ cesedi deñizge atıla.
