Ukraina televizion ve radioeşittirüv komiteti Qırım ilhaqı devamında Ukrainanıñ qıta qısmında «Rusiyeniñ Qırımı» aqqındaki 11 kitapnı yasaqladı. Bu aqta Qırım.Aqiqatqa bergen izaatında, neşriyat mahsulatlarını taqsimlev, litsenziyalav ve nezaret etüv idaresi yolbaşçısınıñ muavini Aleksandr Latay ikâye etti.
«Muellifi Valeriy Sinelnikov olğan 8 kitap yasaqlandı. Kitaplarnıñ metininde yazışma adresi olaraq - «Qırım, Rusiye» dep kösterilgen. Ayrıca daa eki dane «Şeñ kompaniya» ve «Dünyada seyahat» adlı bala kitaplarında basqınen bağlı malümatta «Qırım, Rusiye»de neşir etilgen dep yazılğan. Ondan da ğayrı Maylen Konstantinovskiyniñ «Himiya» adlı kitabında da«Qırım, Rusiye»de neşir etilgen dep yazılğan, – dedi Latay.
Onıñ sözlerine köre, bu kitaplarnıñ ekseriyeti «Fors Ukraina» şirketine ait.
«Bugün olarnıñ vekillerinen laf ettim ve olar artıq böyle kitaplarnı yollamaycaqlarına, bular ise, közden qaçqanına işandırdılar», – dep qoştı o.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
