Fevralniñ 22-nde Çernihiv vilâyeti İçnya şeerinde, XX asır başında yaşağan qırımtatar milliy ve maneviy lideri Noman Çelebicihanğa bağışlanğan hatıra tahatası yerleştirildi. Bu aqta Facebookta Ukraina informatsion siyaseti naziriniñ muavini Emine Ceppar haber etmekte.
Onıñ sözlerine köre, işbu tahta Noman Çelebicihannıñ ölgenine 100 yıl tolğanı munasebeti ile yerleştirilgendir: o, 1918 senesi fevralniñ 23-nde Qırımda rusiyeli bolşevikler tarafından öldürilip, cesedi deñizge atılğan edi.
«Ne içün Çernihiv vilâyetindeki İçnya şeeri saylândı? Noman bey Peterrbugqa oqumağa ketken vaqıtta bir qaç sefer İçnya demiryol stantsiyasında toqtağan eken. Aytqanlarına köre, o qapıstalı börekler alıp aşay da, pek maqtay ve ayatında aşağan eñ lezetli soyları dey eken! Biz İlmi Umerovnen beraber de alıp aşadıq! Pek lezetli», – dep yaza Ceppar.
Noman Çelebicihan (1885-1918) – qırımtatar yazıcısı, qırımtatarlarnıñ milliy gimniniñ muellifi, 1917-1918 seneleri qurulğan qırımtatar halqı birinci Qurultaynıñ esasçısı olğan diniy, cemaat ve siyasiy erbabıdır.
