Link açıqlığı

Saatnıñ esas haberi

Herson vilâyetinde Qırım sakinleri öz vesiqalarını resmiyleştirebilecek merkezler ağı açılacaq – Babin


Ukraina prezidentiniñ Qırımdaki daimiy temsilcisi Boris Babin

Herson vilâyetinde Qırım sakinleri vesiqalarını resmiyleştrebilecek memuriy hızmet merkezleriniñ sayısı arttırılacaq. Bu aqta fevralnin 22-nde Ukraina prezidentiniñ Qırımdaki daimiy temsilcisi Boris Babin,«İzberkom» neşirine bergen intervyusında haber etti.

Onıñ sözlerine binaen söz, Herson vilâyetinde memuriy hızmet berüv merkezleri (MHBM) ağınıñ arttırıluvı aqqında kete.

«Bir qaç territorial cemaatçılıq böyle bir merkezlerniñ Çaplınka, Kahovka, Novotroitskoyede açmağa qarar berdi ve ayrıca Hersondaki MHBM keñişletilecek. Ondan da ğayrı, «Kalançak» KÇKN-na yaqın yerleşken Preobrajenka köyüne ve Novoalekseyevkağa da kerek donatmalar satın alunuv meselesi çezilmekte. Ayrıca, yaz aylarınıñ başında, Hersonda çalışqan ve pasport bergende künde maksimum 100 az buçuq ziyade kişini qabul etken, statistikağa köre ise, olarnıñ yarısından ziyadesi Qırım sakini olğan «Dokument» devlet işhanesiniñ bölügi keñişletilecek», – dep beyan etti Babin.

Onıñ sözlerine köre, «Dokument» devlet işhanesiniñ bölügi keñişletilgen soñ, «2018 senesiniñ ilk yarısında bile qabul etüv sayısı beş qat artacaq eken».

«Böyleliknen, Ukraina Hersonda Qırım sakinlerine er iş künü 250-şer pasport berip olacaq», – dep qayd etti Ukraina prezidentiniñ Qırımdaki daimiy temsilcisi.

Qırım Rusiye tarafından ilhaq etilgen soñ, 2014 senesi Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.


Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.

XS
SM
MD
LG