Fevralniñ 22-nde Kyivdeki Mustaqillik meydanında qırımtatar faali Server Karametov bir kişilik piket keçire, dep haber ete Qırım.Aqiqat muhbiri.
Aktsiyada Karametov «Men Qırımdan kelgen Ukraina vatandaşı, qırımtatarım. Prezidentnen körüşmek isteyim. Qırımnıñ tamır halqı muhtariyet talap ete», dep yazılğan plakatnen tura.
Karametov tarif etkenine köre, körüşüvde o, Ukraina prezidenti Petro Poroşenkoğa işğal altındaki Qırımda yapılğan repressiyalar ve yarımadadaki qırımtatar muhtariyeti meselesini muzakere etmek istey eken.
Qırımtatar faali Server Karametov 2017 senesi avgust ayında Aqmescitte, qırımtatarlarnıñ liderlerinden biri olğan Ahtem Çiygozğa qol tutmaq maqsadınen keçirilgen bir kişilik piket içün tutulğan edi. Oña qarşı eki dane memuriy protokol tizilgen edi. Biri – «bir kişilik piket qaidelerini bozğanı» sebebinden, digeri de – «politsiya hadimine qarşılıq köstergeni» içün.
Daa soñra Kreml nezaretindeki Aqmescitniñ Jeleznodorojnıy rayon mahkemesi «politsiya hadimine qarşılıq köstergeni» içün 10 künlük memuriy ceza tayinlegen edi.
