2014 senesi fevralnin 26-nda Qırım Yuqarı Şurası ögündeki nizamsızlıqlarda elâk olğan Valentina Korneva ve İgor Postnıy ölüminden soñ, «Qırım Cumhuriyetini qorçalağanı içün» medalinen taqdirlendi, dep yaza fevralniñ 22-nde, Kreml nezareti altındaki Qırım parlamentiniñ yolbaşçısı Vladimir Konstantinov.
«Bu isimler Qırımda ve onıñ tışında belli olması içün biz elimizden kelgen er şeyni yapmaq kerekmiz», – dep yaza Konstantinov.
2014 senesi fevralniñ 26-sında Qırım Yuqarı Şurasınıñ binası ögünde bir qaç biñ qırımtatar ve Ukraina tarafdarı olğan faaller iştirak etip, qırımlı deputatlar qabul etmege istegen ve yarımada ilhaq etilgen soñ resmiyleştirilebilecek separatist qanunlarına qarşı narazılıq bidirgen edi.
Miting iştikarakçşlerine qarşı Rusiye tarafdarları ve kazaklar toplanda, insanlar biri-birini ezilgeninden eki kişi elâk olğan edi. Ancaq o zaman yalıñız qırımtatar faalleri mesuliyetke çekildi.
2015 senesinde bir gruppa qırımtatar faallerine qarşı, 2014 senesi fevralniñ 26-sında Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün mahkeme başlatıldı. Olar kütleviy nizamsızlıqlarda iştirak etkenlerinde qabaatlandı.
Daa soñra mahkeme «Fevral 26 işi»ni ekige ayırdı: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
