Rusiye tiş işleri nazirligi Ukraina elçihanesiniñ 2014 senesi fevral-mart aylârında Qırım olıp keçken vaziyetni tarif etüvinen bağlı muracaatını nazar-itibarğa almağan eken. Bunı Ukrainanıñ BMT daimiy temsilcisi Vladimir Yelçenko, Ukrainanıñ sabıq prezidenti Viktor Yanukoviçni devlet hainliginde qabaatlanuvınen bağlı mahkemesinde keçirilgen sorgulavda beyan etti.
«Men Ukrainanıñ Rusiye elçisi olaraq, o zamanki facialı vaqialarğa baqmadan, eki taraflı munasebetlerimizniñ bir daa eyileşmesi içün elimden kelgen er şeyni yapmaq kerek degen fikirnen areket ete edim. Fevral ayınıñ ortasından başlap, iç bir türlü bağ qurulmağan edi (Rusiyenen –QA). Yekâne bağ menbası olğan müessise - Moskvadaki elçihane edi, ancaq elçihaneniñ Rusiye Qırımda ne yapa degen muracaatına, biz cevap alamadıq, yani Rusiye MİDi bu meseleni nazar-itibarğa almağan edi», – dedi Yelçenko.
Belli olğanı kibi, Yelçenko 2010 senesi iyül ayından 2015 senasi dekabr ayına qadar Ukrainanıñ Rusiyedeki elçisi vazifesinde çalışqan edi.
Obolon rayon mahkemesi 2017 senesi iyün ayınıñ soñunda, Ukrainanıñ sabıq prezidenti Viktor Yanukoviçni devlet hainliginde qabaatlanuvınen bağlı ğıyabiy mahkemesini keçirip başladı. Maydan vaqiaları ayrı bir iş vastasınen taqiq etile.
Maydanda insanlar qurşunğa tizilgen soñ, Rusiyege qaçqan Ukrainanıñ sabıq prezidenti Viktor Yanukoviçni qabaatlavlarnı inkâr ete.
