Canköy rayonı Bay Könçek (Oktâbr) köyünde yaşağan dört qırımtatarnıñ evini cinayetçiler qıdıruv bölüginiñ hadimi ziyaret etti, dep haber ete «Qırım birdemligi» cemaat teşkilâtı.
«Asanov Osman, Asanov Usein, Saitov Smail ve Ayar Server qomşu olıp yaşaylar. Bugün olarnı evini cinayetçiler qıdıruv bölüginiñ hadimi ziyaret etti. Ziyaretiniñ sebebi, bu şahıslarnıñ 2018 seneis yanvarniñ 27-nde «Qırım birdemligi»niñ Sudağda keçken toplaşuvnı ziyaret etkinen bağlı», – denilmekte haberde.
Haber etilgenine binaen, cinayetçiler qıdıruv bölüginiñ hadimi köy sakinlerinen «añlatuv subeti» keçirgen. Qırımtatar faalleri ayrıca qayd etkenine köre, telükesizlik organlarınıñ temsilcisi olarnıñ bir vesiqa imzalağanlarını istegen, lâkin Bay Könçek (Oktâbr)köyüniñ dört sakini de imzalamaqnı red etken.
Rusiye MVDsi Qırım idaresiniñ saytında «cinayetçiler qıdıruv bölügi hadiminiñ ziyaretinen» bağlı malümat yoq.
Yanvarniñ 27-sinde Suvdağda keçken «Qırım birdemligi» cemaat teşebbüsiniñ oturışuvına Rusiye OMON hadimleri kelgen edi.Telükesizlik hadimleri, olarğa «bu adres boyunca silâlı toplaşuv keçe», dep telefon etkenlerini tarif ettiler. Olar tedbir iştirakçilerinden pasportlarını taqdim etmekni talap etip, aksi alda er kesni, avtozaklarğa yüklep, poliske alıp ketecekleri ile qorquzğan ediler.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
