Fevralniñ 20-nde Rostov-na-Donu şeerinde keçken Şimaliy-Kavkaz okrugınıñ arbiy mahkemesi oturışuvında Yaltalı «Hizb ut-Tahrir işi» boyunca, daa evel SBU hadimi olğan FSB hadimi Aleksandr Kompaniytsevniñ sorğulanuvı devam etti. Qırım.Aqiqatqa Azatlıq Radiosınıñ muhbiri haber etkenine köre, imayeci tarafnıñ bazı advokatları oturışuvda Qırım Garnizon mahkemesindeki videobağ vastasınen iştirak etken.
Bu arada, mahkeme açıq şekilde keçkenine baqmadan, soy-sop ve aqrabalar mahkeme zalına kirsetilmegen.
«Bizler SBUnıñ sabıq hadimi olğan, FSB taqiqatçısı Aleksandr Kompaniytsevni sorğulamağa devam ettik. O, qabaatlavnen alâqalı muayyen bir şey aytamadı, yalıñız Hizb ut-Tahir teşkilâtı ve celp etüv usulları aqqında uzun fikir yürsetti. Ancaq oña muayyen sualler berilgeninen, o mesele devlet sırı olğanını aytıp, cevap bermege red ete edi», – dep ikâye etti advokat Aleksey Ladin.
Nevbetteki oturışuv fevralniñ 20-nde ötkerilmesi planlaştırıla.
2016 senesi fevral-mart ayları arasında Yaltada Arsen Cepparov ve Refat Alimov, Emir-Üsein Kuku, Muslim Aliyev, Enver Bekirov ve Vadim Sirük tutulıp alınğan edi. Olar Rusiyede yasaqlanğan «Hizb ut-Tahrir» islâm siyasiy teşkilâtına alâqası olğanındsa qabaatlana.
Daa evel Rusiye arbiy mahkemesi Yaltalı «Hizb ut-Tahrir işi» mahkemelerini Aqmescitte köçme oturışuvda keçire edi. Ondan soñ tevqif etilgen qırımlılar Rostov-na-Donu şeerine yollanıldı.
Yanvarniñ 24-nde Ukraina tış işleri Nazirligi RusiyedenYaltalı «Hizb ut-Tahrir işi»niñ altı figurantını azat etmesini talap etken edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
