Kreml nezaretindeki Aqmescit rayon mahkemesi Zello internet-radio vastasınen ekstremistik materiallarnıñ darqatılmasında qabaatlanğan İsmail Ramazanovnıñ tevqifini uzattı.
Qırım.Aqiqatnıñ muhbiri haber etkenine köre, Ramazanovnıñ tevqifi bir ayğa yani martnıñ 18-ne qadar uzatılğan.
Qabaatlağan taraf bu talapqa qol tuttı ve Ramazanovta Ukraina pasportı olğanı içün, onıñ yarımadadan qaçıp ketme fursatı olabilecegini qayd etti.
Advokat Aleksey Ladin Ramazanovnıñ tevqifini uzatmamağa rica etti.
«Taqiqat, menim imayem altındaki şahısnıñ ukrain pasportı olğanı içün Qırımnı terk etebilecegini iddia ete. Qırımdaki uququiy çatışma şunda ki, 2014 senesi baarde mında olğan Qırım sakinleriniñ epsinde ekişer pasport bar. Ramazanov Rusiye pasportını almağa istemegen edi, amma bu er kes içün mecburiy olğan bir al», – dedi Ladin.
Onıñ sözlerine köre, Ramazanov yarımadanı terk etebilecegine dair, iç bir fakt yoqtır.
Ondan da ğayrı advokat, taqiqat 10 kün içinde Ramazanovqa nisbeten öz qabaatlavını bildirmek kerek edi, böyleliknen onıñ SİZOda qalğanı, qanunğa bütünley zıt kelgenini beyan etti.
«Menim qabaatım yoq, onıñ içün taqiqattan gizlenmege de mana yoq. İç bir yerge ketmege niyetim yoq. Qırımda menim evim bar, qart ana-babamnen beraber oturam, olar yardımğa muhtac. Taqiqattan iç bir yerge gizlenmege niyetim yoq, qabaatsız olğanımnı isbat etmege areket etecegim», – dedi Ramazanov mahkemede.
«Ramazanov işi» boyunca taqiqat devam ete. Qabaatlağan taraf, FSB ekspertizası Ramazanov ile Zello internet-radiosındaki duşmanlıq ve nefret doğurğan mesajlar arasında bir bağ tapmağa areket ete. Bugün iş materiallarına Zello vastasınen qonuşmaq içün internetke kirgen qullanıcığa berilgen IP-adresi ve telefon raqamı boyunca provayderden alınğan cevap ilâve etildi.
Yanvarniñ 23-nde Rusiye küç idaresi hadimleri Novıy Mirde sakini qırımtatarı İsmail Ramazanovnıñ evinde tintüvler ötkerip, onı ekstremiz teşviqatında qabaatlağan edi.
Daa soñra Rusiyeniñ Qırımdaki Taqiqat komitetinde, taqiqatçılar internet-radio vastasınen ekstremistik materiallarnıñ darqatılmasında qabaatlanğan Aqmescit rayonı sakinine qarşı cinaiy iş açılğanı aqqında haber etken edi.
Kreml nezaretindeki Aqmescit rayon mahkemesiniñ qadısı İrina Kirillova Ramazanovnı fevralniñ 23-ne qadar 30 künge apiske yolladı.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
