İlhaq etilgen Qırımda «ükümet ve eali arasındaki bağnı teminleycek» Rusiye nezareti altındaki qırımtatar halqı keñeşi meydanğa ketirildi. Bu aqta «RİA KRIM» neşirine bergen izaatında Qırım musulmanarı müftisiniñ muavini Ayder İsmailov haber etti.
«Qırımtatarlar ve ükümet arasındaki munasebetlerni daa yüksek seviyege kötermek maqsadınen qırımtatar halqınıñ mesleat keñeşi meydanğa ketirildi», – dep bildire KHV İsmailovnıñ sözlerini.
Onıñ aytqanına köre, keñeşke çeşit saalarda çalışqan 15 mütehassıs kirgen. Kreml nezaretindeki Qırım müftisi Emirali Ablayev oña yolbaşçılıq yapacaq.
2014 senesi Rusiye yarımadanı ilhaq etken soñ, Qırım musulmanları diniy idaresi öz areketlerini Qırımtatar Milliy Meclisinen koordinatsiya yapmaqnı toqtataraq, Rusiye qanunlarına binaen Qırım ve Aqyar musulmanları diniy idaresi (QAMDİ) olaraq qayd olundı.
2016 senesi noyabr ayında Qırımdan köçken musulmanlar Qurultay keçirerek, Ukraina qıta qısmındaki Qırım Muhtar Cumhuriyeti musulmanlarınıñ Diniy idaresini teşkil etmege qarar bergen edi. Müfti olaraq Ayder Rustemov saylânğan edi.
2017 senesi oktâbr ayında Ukraina medeniyet nazirliginiñ milletler ve dinler departamenti Rustemov yolbaşçılığındaki Qırım Muhtar Cumhuriyeti musulmanlarınıñ Diniy idaresini qayd etti.
