Kreml nezareti altındaki Aqmescitniñ Kiev rayon mahkemesi «narazılıq meydanı»nıñ faali Fazıl İbraimovnı apıste qaldırdı. Bu aqta fevralniñ 17-nde tevqif etilgen şahısnıñ advokatı Edem Semedlâyev, mahkeme oturışuvından soñ yapqan vidiomuracaatında haber etti.
«İşbu cinaiy işte pek çoq hata bar, bunı taqiqatçınıñ özü de ayttı. İnsannıñ qanını qaynatqan hatalardan biri, Fazıl ağanıñ 48 saat devamında tutulması. Onı tutıp oturılacaq vaqıt 13:30da bite edi. Vaqıt keçken olsa da, onı kimse qoyıp yibermedi», – dedi Semedlâyev.
Onıñ szölerine köre, imayesi altındaki şahısnıñ 113 saifeden ibaret materiallarnen keregi kibi tanışmasına fursat berilmedi.
«Şübesiz ki, biz bu işni siyasiy iş dep tanıymız», – dep yekün çekti advokat.
«Qırım birdemligi» gruppasınıñ haberine köre, mahkeme oturışuvı esnasında advokat prokurorğa red beyanatı yaparaq, iş materiallarındaki hatalarğa işaret etken.
Mahkeme prokurornıñ reddinen alâqalı beyanatnı qabul etmegen. Şaatlar ve şikâyetçiler oturışuvda iştirak etmegenler. Qabaatlayıcı taraf haber etkenine köre, 4 kişi İbraimovke qarşı, olardan para alğan edi degen uydırıq manada ariza yazğan eken.
«Olar mahkemede iştirak etmediler, çünki taqiqatçı olarnı uyğun tarzda haberdar etmegen eken. Mesele şu şekilde çezildi: taqiqatçı öz elinen (işte şu dört şaat/şikâyetçi Metölkin, Borovik, Lavrenov, Tışkavets) mahkeme oturışuvında iştirak etmege istemeyler dep yazdı», – denilmekte haberde.
Rusiye MVDsiniñ Qırım idaresi fevralniñ 15-nde, Aqmescitniñ Strelkovaya soqağı etraflarında «topraq damartısını işğal etip alğan bir teşkilâtçınıñ» evinde tintüv yapqan edi.
Politsiya «narazılıq meydanı»nıñ faali Fazıl İbraimovnı tutıp alaraq, Rusiye MVDsi Qırım idaresiniñ şeer bölügine ketirgen edi.
Qırım KHV haber etkenine köre, İbraimov resmi olaraq «Rusiye Federatsiyası Cinaiy protsesual kodeksiniñ 91 maddesine binaen cinayet işlegninde şeklenüvi sebebinden tutulıp alınğan».
Fazıl İbraimov, sürgünden soñ avdet etken qırımtatarlar işğal etip alğan topraqlar yani «narazılıq meydanlarınıñ» resmiyleştirilmesi içün alıp barğan kürüşinen meşurdir.
