Dünya Rusiyeniñ «birlik ve demokratiyanı yoq etmek» teşebbüsine qarşı turmaq kerek ve bu devletniñ ordusı ilhaq etilgen Qırım ile Kyiv nezareti tışında qalğan Donbass territoriyalarını terk etmegence, Rusiyege qarşı sanktsiyalarnı quvetlendirmek kerek, dep beyan etti Ukraina prezidenti Petro Poroşenko, Almaniyanıñ Münich şeerinde keçken telükesizlikkonferentsiyasında.
Poroşenko, Rusiyege qarşı kirsetilgen sanktsiyalarnıñ tesir etkenini qayd etti.
«Şimdi, Rusiye ordusı Donbass ve Qırımnı terk etmegence, bunıñ fiyatı ketken sayın artacağını, Moskva oña yollanğan yekâne mesaj olğanını bilmeli. Eger birisi ale daa sanktsiyalar semereli degil dep tüşünse, o zaman biz olarnı quvetlendirip yañılarını kirsetir ve yollarnı qapatırmız», – dedi Poroşenko.
«Kreml özüniñ gizli niyetleriniñ sıñırını bilmey. Ukraina qadar Moskvanıñ gibrid taktikasını daa da yaqın tanığan başqa devlet yoqtır. Onıñ içün men bütün dinyanı, Rusiyeniñ, birligimiz ve demokratiyanı yoq etmek teşebbüsine qarşı turmağa çağıram, çünki bu bizim ve siziñ menfaatlarıñız içün kerek», – dedi Poroşenko.
O, «Rusiyege alıp barğan gibrid cenk, yavaş-yavaş büyük miqyaslı cian gibrid cenkine aylânayatqanını tanımaqtan başqa çare qalmay», dep ilâve etti.
Ayrıca o, bütün dünya cemaatçılığını «öz evinde ve halqara arenada kerçekni qorçalamağa» çağırdı. Poroşenko «AB ve NATOda Ukraina içün açıq qapu qaldırılğanını» rica etti.
Fevralniñ 16-nda Almaniyada fevralniñ 18-ne qadar devam etecek telükesizlik boyunca Münich konferentsiyası başlandı. Dünya devletleriniñ liderleri esasen Ukraina ve Suriye çatişmalarını ve Şimaliy Koreyanıñ ambitsiyalarını muzakere etmege planlaştıra.
