Kreml nezareti altındaki mahkemeci Viktor Mojelânskiy, «Veciye Kaşka işi»niñ figurantı Kazim Ametovnıñ tevqif müddetini uzatır eken, mahkeme qararında başqa bir şahısnıñ, yani daa evel Bağçasarayda tevqif etilgen Ernest Ametovnıñ adı, soyadı ve doğğan kününi yazğan. Bu aqta özüniñ Facebook saifesinde advokat Emil Kurbedinov haber etmekte.
Onıñ sözlerine köre, uquqqoruyıcı organ hadimleri «buña istenilmeden hata yapıldı degen».
«Men ve menim müşterim tevqif müddeti uzatılğanına dair mahkeme qararını temyiz etüv aqqından marum etildik. Mahkemeniñ ilk baştaki qararında Kazim Ametovnıñ adı yoq edi ve, aslında, temyiz etmege bir esas yoq edi. Men ya da Kâzim ağa mahkemeniñ ilk qararını temyiz eterek, aynı zamanda başqa kişi yerine Kâzim ağanıñ adı yazılsın, siz yañlış kişini apiste tutasıñız, meni apiske alıñız deycek rica etecek degil ya. Saçmalıq!» – dep yaza o.
Kreml nezareti altındaki Qırım Yuqarı mahkemesi fevralniñ 9-nda «Veciye Kaşka işi»nen alâqalı şikâyetni baqmaqnı red etti. Qabaatlanğan biri olğan Bekir Degermenciniñ qadını Aliye Degermenciniñ sözleine köre, taqiqatçı eksiklikler tapılıp, iş tekrar birinci basamaq mahkemesine yollanılğanı aqqında haber etken.
Yanvarniñ 12-nde, Kreml nezaretindeki Aqmescit Kiev rayon mahkemesi «Veciye Kaşka işi» figurantlarınıñ tevqif müddetini daa eki ayğa uzatqan edi.
Noyabrniñ 23-nde kündüz Aqmescitte küç idaresiniñ hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini tutıp aldı. Olar Türkiye vatandaşından para talap etüvde qabaatlana. Rusiye küç idaresiniñ hadimleri tarafından tutuluvlar esnasında qırımtatar milliy areketiniñ veteranı Veciye Kaşka yaramağan edi. Daa soñra qadın vefat etti.
