Rusiyeli küç idaresiniñ hadimleri fevralniñ 15-nde Qurman qasabasınıñ sakini Ayder İbraimov, oña teklif etilgen bir vesiqanı imzalağan olsa edi, 2017 senesi oktâbrniñ 14-nde keçken bir kişilik piketlerniñ teşkilâtçısı olğanı içün mesül sayılacaq edi. Qırım.Aqiqatqa bu aqta «Qırım birdemligi» birleşmesiniñ faali Server Mustafayev ikâye etip berdi.
«Tünevin (fevralniñ 15-nde –QA) oña oktâbrniñ 14-nde onıñ piketler teşkilâtçısı olğanını qabul etecek bir vesiqa ketirgenler. Lâkin bugün, uquqiy oqumışlıq derecesi artıp bara. Onıñ içün o vesiqanı oquğan soñ, imzalamaqnı red etken», – dep ikâye ete Mustafayev.
Onıñ sözlerine köre, adı ve soyadı yazılacaq satır boş eken, onıñ içün «bu kâğıt imzalanğance, er keske alıp barılacaq».
Ayder İbraimov – 2017 senesi oktâbrniñ 14-nde yarımadada küç idaresi hadimleriniñ repressiyalarına narazılıq köstergen bir kişilik piketler iştiraklerinden biri ola. Fevralniñ 6-nda Kreml nezaretindeki Qırım Yuqarı mahkemesi oña piket içün kesilgen 10 biñ rublelik (4800 grivna) cöremege qarşı berilgen şikâyetini red etken edi.
Oktâbrniñ 14-nde yarımadada küç idaresi hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri bu piketlerniñ iştirakçilerine cöremeler tayin etti.
Piket iştirakçilerine qarşı, piket ötkerilmesiniñ tayin etilgen tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesiniñ 5-nci qısmı) memuriy protokollar tizildi.
Daa soñra Aqmescit, Canköy, Aluşta, Suvdağ şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları ötkerildi. İçki işler nazirliginiñ Qırım boyunca ekspertiza merkezi tarafından «piketler umumiy maqsat, niyet ve teşkil etilüv ile birleştirilgen» şeklinde berilgen hulâsa, qabaatlav tarafınıñ esas delili oldı.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
