Aqmescitte «narazılıq meydanı»nıñ faali Fazıl İbraimovke qarşı cinaiy iş açıldı, dep haber ete fevralniñ 15-nde Qırım uquqimaye gruppası.
Uquqimaye teşkilâtınıñ saytında haber etilgenine binaen, rusiyeli küç idaresiniñ hadimleri İbraimovke dolandırıcılıq sebebinden cinaiy iş açılğanı aqqında beyan etken. Bu aqta tutulıp alınğan şahısnıñ qadını Mumine İbraimova bidirmekte.
«Meger o eñ azından yedi yıl devamında «Strelkovaya» narazılıq meydanı iştirakçilerinden topraqlarını mülk edinmeleri içün yardım etecek dep, para toplağan emiş. İbraimovnıñ qadını aytqanına köre, tintüv qararında faalniñ «areketlerinden» zarar körgen dört kişiniñ soyadı ve 4,8 mln rubleni (2 mln grn ziyade - QA) teşkil etken umumiy zarar miqdarı yazılğan eken», – denilmekte haberde.
Mumine İbraimova iddia etkenine köre, ne o, ne de onıñ qocası o insanlarnı tanımay eken ve faal olardan asla para almağan. İbraimovke tüntüv qararınıñ kopiyası berilmegen, dep biidire uquqimayecileri.
Ayrıca, tintüv esnasında Fazıl İbraimovnıñ seyfte muafaa etilgen qaydlı avcı tüfegi tutulıp alınğan.
Rusiye MVDsi Qırım idaresiniñ matbuat hızmeti haber etkenine köre, fevralniñ 15-nde Aqmescitniñ Strelkovaya soqağı etraflarında dolandırıcılıq areketlerinde şeklenüv sebebinden açılğan bir cinaiy iş çerçivesinde, topraq damartısını işğal etip alğan bir teşkilâtçınıñ evinde ruhsetli tintüv yapilğan edi.
Muessise qayd etilgenine köre, mezkür şahısnıñ Rusiye Cinaiy-protsesual kodeksiniñ 91 maddesine binaen (cinayet işlegninde şeklenüvi sebebinden) tutulıp alınuvı muzakere etilmekte. Taqiqat devam ete.
Fevralniñ 15-nde Aqmescitniñ Strelkovaya soqağı etraflarında Rusiye MVDsi Qırım idaresiniñ hadimleri «topraq damartısını işğal etip alğan bir teşkilâtçınıñ» evinde tintüv yapılğan edi. Rusiye politsiyasınıñ hadimleri «narazılıq meydanı»nıñ faali olğan Fazıl İbraimovnı tutıp alaraq, Rusiye MVD idaresiniñ şeer bölügine ketirgen ediler. Qırım KHV haber etkenine köre, İbraimov resmi olaraq «Rusiye Cinaiy-protsesual kodeksiniñ 91 maddesine binaen cinayet işlegninde şeklenüvi sebebinden tutulıp alınğan edi».
Fazıl İbraimov, sürgünden soñ avdet etken qırımtatarlar işğal etip alğan topraqlar yani «narazılıq meydanlarınıñ» resmiyleştirilmesi içün alıp barğan kürüşinen meşurdır.
