Kreml nezaretindeki Qırım Yuqarı mahkemesi qırımtatarlarğa qol tutmaq maqsadınen bir kişilik piketke çıqqan doquz iştirakçiniñ şikâyetlerini red etti. Bu aqta fevralniñ 15-nde, Facebookta «Qırım birdemligi» cemaat teşkilâtı haber etmekte.
«D. Halilov, A. İbraimov, R. Emiruseinov, N. Ametov, E. Seit-Eminov, D. Ziyadinov, A. Suleymanov, A. Abibullayev ve A. Ziyadinovnıñ çöremeleri deñiştirilmeden qaldırıldı. R. Asanovnıñ cöremesi 15 biñden 10 biñge deñiştirildi», – denilmekte haberde.
Oktâbrniñ 14-nde yarımadada küç idaresi hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri bu piketlerniñ iştirakçilerine cöremeler tayin etti.
Piket iştirakçilerine qarşı, piket ötkerilmesiniñ tayin etilgen tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesiniñ 5-nci qısmı) memuriy protokollar tizildi.
Daa soñra Aqmescit, Canköy, Aluşta, Suvdağ şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları ötkerildi. İçki işler nazirliginiñ Qırım boyunca ekspertiza merkezi tarafından «piketler umumiy maqsat, niyet ve teşkil etilüv ile birleştirilgen» şeklinde berilgen hulâsa, qabaatlav tarafınıñ esas delili oldı.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
