Link açıqlığı

Saatnıñ esas haberi

«Narazılıq meydanı»nıñ faali olğan İbraimov politsiyağa ketirilerek tutulıp alındı – KHV


Fazıl İbraimov
Fazıl İbraimov

Aqmescit politsiyasınıñ hadimleri «narazılıq meydanı»nıñ faali olğan Fazıl İbraimovnı Rusiye MVD idaresiniñ şeer bölügine ketirerek, tutıp aldı.

Uquqorçalav organlarındaki menbağa bazanğan «Krıminform» haber etkenine köre, «İbraimov dolandırıcılıq areketlerinen bağlı açılğan bir cinaiy iş çerçivesinde» şaatlıq yapa eken.

«Şeklengen şahıs şeer bölügine ketirildi. Şimdi taqiqçinen subetleşip, şaatlıq yapa», – dep bildire KHV menba köstermeden.

«Krıminform» keççe haber etkenine köre, İbraimov resmi olaraq «Rusiye Federatsiyası Cinaiy protsesual kodeksiniñ 91 maddesine binaen cinayet işlegninde şeklenüvi sebebinden tutulıp alınğan».

«Topraq damartısınıñ işğalcileri koordinatorınıñ yapqan areketlerinden dolayı zarar körgenlerniñ umumiy zararı 4,8 mln rubleni (2 mln grn ziyade –QA) teşkil ete», – dep iddia ete Qırım ükümetine yaqın olğan neşir.

Rusiye MVDsiniñ Qırım idaresi fevralniñ 15-nde, Aqmescitniñ Strelkovaya soqağı etraflarında «topraq damartısını işğal etip alğan bir teşkilâtçınıñ» evinde tintüv yapqan edi.

KHV haber etkenine köre söz, sürgünden soñ avdet etken qırımtatarlar işğal etip alğan topraqlar yani «narazılıq meydanlarınıñ» resmiyleştirilmesi içün alıp barğan kürüşinen meşur olğan Fazıl İbraimov aqqında kete edi.

Qırım MVDsiniñ saytında İbraimovnıñ tutulıp alınğanı aqqında bir malümat bermey. Qırım.Aqiqat olıp keçkenlerniñ inceliklerine bilmege areket ete.

Fevralniñ 4-nde Aqmescitte Aqmecsit rayonı Strelkovaya «narazılıq meydanınıñ» faalleri miting keçirerek, Rusiye prezidenti Vladimir Putinden evlernen caminiñ yıquvdan qorçalmasına» çağıraraq, açlıq ilân etken ediler.

2017 senesi avgust ayında rusiyeli ükümet - «narazılıq meydanı» yerine qurulacaq «Krımskaya roza» yañı mesken ev massivinen alâqalı ictimaiy diñlevler keçire. Fazıl İbraimov o künü çıqış yapamay, çünki onı zaldan çıqarıp yibereler. Onıñ safdaşları oña qol tutqanda, k,tek çıqa. Fazıl İbraimov «politsiyanıñ qanuniy talabına riyayet etmemekte» qabaatlanıp, beş künge tevqif etile. Diñlevler mufafaqiyetli keçti dep tanıla.

İctimaiy diñlevlerde çıqış yapmaq istegeni içün rusiyeli küç idaresiniñ hadimleri 62-yaşındaki İbraimovnıñ evine tintüv yapmağa kele. Onıñ evinde islâmnen alâqalın kitap ve «narazılıq meydanınıñ» iştirakçilerinen bağlı vesiqalar qıdıralar.

«Strelkovaya» «narazılıq meydanı» yerine «Krımskaya roza» adlı 9 biñ kişilik yañı rayon qurulması planlaştırıla. Mesken evlerden ğayrı mında mektep, balalar bağçası, sport kompleksleri ve tükânlar qurulması planlaştırıla. Şimdi bu yerde esasen sürgünden qaytqan insanlar yaşay.

XS
SM
MD
LG