Rusiye Şimaliy-Kavkaz okrugınıñ arbiy mahkemesi fevralniñ 20-ne qadar Yaltalı «Hizb ut-Tahrir işi» boyunca teneffüs ilân etti.
Qırım.Aqiqat muhbiri haber etkenine köre, mahkemede muim şaat olğan – Qırım ve Aqyar FSB idaresiniñ hadimi Aleksandr Kompaniytsev sorğulandı.
Sorğulavnı qabaatlanğan Muslim Aliyev ve Enver Bekirov keçirdi. Añılğan soñki şahıs FSB hadimini ilk sefer SİZOda körgeni, o ise anda, Bekirovnı işbirlik yapmağa zorlağa, aks alda onıñ aqrabası olğan Refat Alimovnı tevqif eteceginen qorquzğanı aqqında ikâye etip berdi. Bekirov red etüvi neticesinde, Alimov bir qaç aydan soñ tutulıp alına.
«Bu iş, işbu muim şaatnıñ qabaatlavından soñ başlana. Aslında o, qabaatlanğan şahıslarnıñ qanunğa zıt kelecek faaliyetini tasdıqlaycaq iç bir muayyen malümat taqdim etip olamadı. Atta mahkeme, onıñ «Hizb ut-Tahrir» faaliyeti, peyda oluvı aqqındaki mulâazalarğa dalğanı sebebinden çıqışını toqtatmağa mecbur qalaraq, muzakere etilgen mevzunıñ tışına çıqmamağa rica etti», – dep ikâye etti Qırım.Aqiqatqa advokat
İmayeci Sergey Loktev ayrıca, Kompaniytsev qabaatlanğanlarnıñ areketlerine qıymet kesmek içün mahsus bilgige saip olmağanını, lâkin olarnıñ körüşüvleri şübeli olğanından şübelengeni aqqında beyan etkenini qayd etti. Körüşüv diñlemeleriniñ audioqaydlarına qıymet kesmek içün o FSB ekspertine yollağan eken.
Kompaniytsevniñ sorğulanuvı fevralniñ 20-nde ötkerilecek nevbetteki oturışuvda devam ettirilecek.
2016 senesi fevral-mart ayları arasında Yaltada Arsen Cepparov ve Refat Alimov, Emir-Üsein Kuku, Muslim Aliyev, Enver Bekirov ve Vadim Sirük tutulıp alınğan edi. Olar Rusiyede yasaqlanğan «Hizb ut-Tahrir» islâm siyasiy teşkilâtına alâqası olğanındsa qabaatlana.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
