Link açıqlığı

Saatnıñ esas haberi

Yaltalı «Hizb ut-Tahrir işi»nen bağlı mahkemede Rusiye FSBsiniñ hadimi sorğulandı


Fevralniñ 15-nde Rusiye Şimaliy-Kavkaz okrugınıñ arbiy mahkemesinde Yaltalı «Hizb ut-Tahrir işiniñ» ilk mahkeme oturışuvında Rusiye FSB hadimi olğan Aleksandr Kompaniytsev şaat olaraq sorğulandı. Bu aqta Facebookta Amnesty International Ukraina uquqimaye teşkilâtı haber ete.

Şaat bergen malümatqa binaen, «Muslim Aliyev «Hizb ut-Tahrirniñ» Yalta ve Aluşta bölükleriniñ reberi ola eken». Onıñ sözlerine köre digerleri celp etüvnen «oğraşqan».

«Gizli audio ve videoqaydlar yapıldı – körüşken yerleri tesbit etilip, taqip etildi. Materiallar ekspertizadan keçti ve neticede du - «Hizb ut-Tahrirniñ» toplaşuvları olğanını kösterdi. Sorav keçirildi ve şaatlar mahkümlerniñ «Hizb ut-Tahrirge» alâqadar olğanlarını tasdıqladı. Menim ağlarım vastasınen de olarnıñ alâqadar olğanı tasdıqlandı. İsbatlar ise: vesiqa ve nesneler, YouTubedaki videolar, Aliyev konferentsiya ve mitinglerde natıq olaraq iştirak etkeni belli. Tintüv yapılğanda, teşviqat materialları tapılğan edi», – dep ayttı Kompanitsev.

Advokatnıñ, şaattan Aliyev üceyre reberi olğanını tasdıqlaycaq vesiqalı delil kösterebilemi degen sualine, Kompaniytsev «diñlevler ve şaatlarnıñ sözleri esasında netice çıqarğanı» aqqında ayttı.

Bir kün evel Rostov-na-Donu şeerinde Yaltalı «Hizb ut-Tahrir işi» boyunca ilk mahkeme oturışuvı ötkerildi.

Daa evel Rusiye arbiy mahkemesi Yaltalı «Hizb ut-Tahrir işi» mahkemelerini Aqmescitte köçme oturışuvda keçire edi. Ondan soñ tevqif etilgen qırımlılar Rostov-na-Donu şeerine yollanıldı.

2016 senesi fevral-mart ayları arasında Yaltada Arsen Cepparov ve Refat Alimov, Emir-Üsein Kuku, Muslim Aliyev, Enver Bekirov ve Vadim Sirük tutulıp alınğan edi. Olar Rusiyede yasaqlanğan «Hizb ut-Tahrir» islâm siyasiy teşkilâtına alâqası olğanındsa qabaatlana.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG