Rusiye ilhaq etken Qırımnıñ Curçi rayon hastahanesiniñ hadimlerine devlet, 2018 senesi yanvar ayı içün 3 mln rubleden (1,2 mln grn civarında) ziyade aylıq borcu toplanğan.
Qırımnıñ rusiyeli prokuraturası bir kün evel haber etkenine köre, devlet tibbiy müessiseniñ 382 hadimine para borcu bar.
«İşçilerniñ çalışma aqlarını qorumaq maqsadınen rayon prokurorı sağlıq müessisesiniñ reberine bir teklif yolladı. Onıñ közden keçirilüvi neticesinde, borç bütünley tölenip, tibbiyet hadimleriniñ aqları tiklengen», – denilmekte haberde.
2017 senesi oktâbr ayında Qırım sağlıq nazirligi yarımadada ekim yetişmegenini tanığan edi. Kreml nezareti altındaki Qırım sağlıq naziri Aleksandr Golenko ikâye etkenine köre, ilhaq etilgen Qırımnıñ tibbiy müessiselerinde 900 mütehassıs yetişmemekte.
2017 sensi dekabr ayında, Rusiye emek ve sotsial imaye nazirligi haber etkenine köre, ilhaq etilgen Qırımda olğan aylıq borcu 26 mln rubleden (12,2 mln grivna civarında) ziyade olğanını, Aqyarda ise - aman-aman 40 mln rubleni (18,8 mln grivna) teşkil etkenini bildirgen edi.
