Link açıqlığı

Saatnıñ esas haberi

Rusiyeli sıñırcılar Qırım memuriy sıñırındaki postlarını yoq etecek – Ukraina Devlet sıñır hızmeti


Ukraina Devlet sıñır hızmeti haber etkenine köre, rusiyeli sıñırcılar ilhaq etilgen Qırımnıñ memuriy sıñırındaki blok-noqtalarını yoq etecek eken. Bu aqta Qırım.Aqiqatqa fevralniñ 14-nde Ukraina Devlet sıñır hızmeti KHV işbirlik meseleleri boyunca Azav-Qara deñiz regional idaresi yolbaşçısınıñ yardımcısı Maksim Soroka ikâye etip berdi.

Onıñ sözlerine köre, daa evel rusiyeli sıñırcılar «Kalançak» ve «Çaplınka» KÇK noqtalarındaki postlarnı yoq etkenler, fevralniñ 14-nde ise«Çonğar» qarşısındaki postnı yoq etmege başlağanlar.

Soroka, rusiyeli sıñırcılar ukrain noqtalarına yaqın yerleşken postlarnı yoq etecekleri, lâkin Qırım memuriy sıñırındaki Rusiyeniñ kiriş-çıqış noqtaları çalışmağa devam etecegini qayd ete.

Ukrain sıñırcıları olıp keçkenlerniñ sebebini bilmey.

«Bu mesele ukrain hızmetlerine tesir etmey ve Qırım memuriy sıñırındaki KÇKN er vaqıttaki kibi çalışmağa devam ete», – dep qayd ete o.

Rusiyeli sıñırcılarnıñ işbu hususnen bağlı resmiy izaatları yoq.

Qırım Rusiye tarafından ilhaq etilgen soñ, 2014 senesiniñ Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.

XS
SM
MD
LG