Kreml nezaretindeki Qırım Yuqarı mahkemesi qırımtatarlarğa qol tutmaq maqsadınen bir kişilik piketke çıqqan on iştirakçiniñ şikâyetlerini red etti. Böyleliknen Rustem Umerov, Marlen Mustafayev, Ravşan Naneyşvili, Rustem Emiruseinov, Eldar Emir-Usein, Sabri Muratov, A. Ablâtipov, Rustem Suleymanov, Mecit Abdurahmanov, A. Acıgafarov onar biñ ruble cöreme tölemege mecbur qalacaqlar.
Bu aqta fevralniñ 14-nde «Qırım birdemligi» birleşmesiniñ Facebooktaki haberinde bildirilmekte.
Oktâbrniñ 14-nde yarımadada küç idaresi hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri bu piketlerniñ iştirakçilerine cöremeler tayin etti.
Piket iştirakçilerine qarşı, piket ötkerilmesiniñ tayin etilgen tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesiniñ 5-nci qısmı) memuriy protokollar tizildi.
Daa soñra Aqmescit, Canköy, Aluşta, Suvdağ şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları ötkerildi. İçki işler nazirliginiñ Qırım boyunca ekspertiza merkezi tarafından «piketler umumiy maqsat, niyet ve teşkil etilüv ile birleştirilgen» şeklinde berilgen hulâsa, qabaatlav tarafınıñ esas delili oldı.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
