Rusiye prezidenti Vladimir Putin 2014 senesi fevralniñ 23-nde gece Qırımnıñ ilhaq etilecegine şahsen özü qarar berdi, dep bidirdi Rusiye Devlet dumasınıñ sabıq deputatı İlya Ponomaryov, fevralniñ 14-nde Kiyv şeeri Obolon rayonında sabıq prezident Viktor Yanukoviçniñ devlet hainliginen alâqalı işnen bağlı sorğulamada.
«Fevralniñ 22-nden 23-ne keçer gecesi Qırımnıñ ilhaqına şahsen Rusiye prezidenti Vladimir Vladimiroviç Putinniñ teşebbüsinen qarar berilgeni aqqındaki bu malümatnı işbu toplaşuvnıñ iştirakçisi bildirgen edi. Bu malümat temelli olğanında şubem yoq», – dedi Ponomaryov.
Onıñ sözlerine köre, Rusiye ükümeti 2014 senesi fevral ayında Ukrainada keçirilgen sotsiologik soravlarnıñ neticelerinden haberdar edi. Olarğa binaen, Rusiye içün uyğun sayılğan prezident Yanukoviç, vaqtından evel ötkerilecek saylâvlarnıñ ekinci turında ğalip olmay bile edi. Bularnı esapqa alaraq, Rusiye Ukrainağa nisbeten qararlaştırğan bir qaç stsenariyi bar edi.
«Stsenariylerden biri Qırım territoriyasında bir dava çıqaruvnı farz etip, bu dava esasında Kreml istegen namzetmni saylâtmaqtan ibaret edi. Faqat bu silâlı bir zapt planı degil edi. Añlağanıma köre, bir territoriyanıñ ayrı bir qısmını zapt etüv planı, pek eyacanlı edi», – dep saya Ponomaryov.
Obolon rayom mahkemesi 2017 senesi iyün ayında sabıq prezident Viktor Yanukoviçniñ devlet hainliginen qabaatlanuvınen alâqalı işniñ ğiyaben baqılmasına keçken edi.
Mahkeme baqqan işte taqiqat Yanukoviçni Ukraina Cinayet kodeksiniñ üç maddesi boyunca qabaatlay yani: 27 maddeniñ 5-nci qısmı (devlet hainligi), 437 maddeniñ 2-nci qısmı (tecavuzkâr cenkke yardım etüv), 110 maddeniñ 3-nci qısmı (insanlarnıñ ölümi ya da diger ciddiy neticeler doğurğan Ukraina topraq bütünligi ve toqunmazlığına yapılğan tecavuzğa yardım etüv). Meydanda insanlar qurşunğa tizilgen soñ, Rusiyege qaçqan Ukrainanıñ sabıq prezidenti qabaatlavlarnı inkâr ete.
