Rusiye prezidentiniñ matbuat kâtibi Dmitriy Peskov iddia etkenine köre, fevralniñ 12-nde Rusiye ve Ukraina yolbaşçıları Vladimir Putin ve Petro Poroşenko telefon vastasınen bağlanıp, tutulmaqta olğan şahıslarnıñ deñiştirilüvini muzakere etkenler.
«Yañı yıldan evel keçirilgen insanlarnıñ deñiştirilüvini devam ettirüv kerekligi aqqında hatırladılar. Aqiqaten de, prezidentler bu mevzu boyunca daa ziyade laf etti», – dep bildire Peskovnıñ sözlerini Azatlıq Radiosı.
O, haber etkenine köre, qonuşma Kyivniñ teşebbüsinen yapılğan ve Ukraina prezidenti Moskva etrafında An-148 uçağı qazalanğanı sebebinden Putinge taziye bildirip, qaza sebeplerini aydınlatmaq içün yardım etmege azır olğanını beyan etken.
Fevralniñ 11-nde kögertesinde 71 insan elâk olğan An-148 uçağı, Rusiyede istisal etilgen, amma onıñ tehnikiy vesiqaları ukrainalı uçaqqurucıları tarafından azırlanğan.
Ukraina Poroşenko ve Putinniñ qonuşması aqqında haber etmegen edi. Ukraina prezidenti Memuriyetiniñ şimdilik bu beyanatnen bağlı izaatı yoq.
Sonki sefer Ukraina ile Rusiye qol tutqan cengâverler arasında esir alış verişi yapılğanda, prezident Petro Poroşenko Ukraina, iç bir Rusiye vatandaşını teslim etmegenini beyan etken edi. Onıñ sözlerine köre, olar Rusiye ve ilhaq etilgen Qırımda apiste tutulğan ukrainalılarğa deñiştirilecek.
