Link açıqlığı

Saatnıñ esas haberi

Qırımda mahkeme bir kişilik piketler beş iştirakçisiniñ şikâyetlerini red etti - «Qırım birdemligi»


Qırımdaki Rusiye mahkemeleri fevralniñ 13-nde, 2017 senesi oktâbrniñ 14-nde bir kişilik piketke çıqqan beş qırımtatar, musulmanlarnıñ şikâyetlerini red etti. «Qırım birdemligi» haber etkenine köre, mahkemeler Zeki Kulametov, Ayder Suleymanov, Enver Halilov ve Muslim Zevriyevniñ cöremelerinen alâqalı qararını deñiştirmey qaldırdı.

Birinci basamaq mahkemesinde qırımlılarğa nisbeten 10 biñ ruble (4,9 biñ grivna civarında - QA) ile 15 biñ ruble (7,3 biñ grivna civarında - QA) arasında cöreme töleme qararı qabul etilgen edi.

Bu arada Canköy mahkemesi Dilâver Asblayevniñ cöremesini 15 biñden 10 biñ rublege tüşürdi.

8 dane appelâtsion şikâyetniñ baqıluvı fevralniñ 14-ne ötkerildi.

Oktâbrniñ 14-nde yarımadada küç idaresi hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Piket iştirakçilerine qarşı, piket ötkerilmesiniñ tayin etilgen tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesiniñ 5-nci qısmı) memuriy protokollar tizildi.

Daa soñra Aqmescit, Canköy, Aluşta, Suvdağ şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları ötkerildi. İçki işler nazirliginiñ Qırım boyunca ekspertiza merkezi tarafından «piketler umumiy maqsat, niyet ve teşkil etilüv ile birleştirilgen» şeklinde berilgen hulâsa, qabaatlav tarafınıñ esas delili oldı.

Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.

XS
SM
MD
LG