Birleşken Devletler özüniñ sanktsiyalar siyasetini Rusiye ilhaq etken Qırımnı keri qaytarmağance ve Minsk añlaşmalarındaki mecburiyetlerini yerine ketirmegence devam ettirecek. Bu aqta ABD Devlet departamenti haber etti.
«Bizim sanktsiyalarımız Rusiye Minsk añlaşmalarındaki mecburiyetlerini yerine ketirmegence devam etecek. Bizm Qırımnen alâqalı ayrı sanktsiyalarımız Rusiye yarımadanı Ukrainağa keri qaytarmağance devam etecek», – dep qayd etile Devlet departamentinde.
Bu arada amerikan tış siyaset muessisesi Rusiyeni Ukrainağa qarşı tecavuzını bitirmege çağırdı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
Donbasstaki silâlı çatışma 2014 senesinden itibaren Rusiye Qırım ilhaq etkeninden berli devam ete. Ukraina ve Ğarp Rusiyeni separatistlerge silâlı yardım köstergeninde qabaatlay. Kreml bu qabaatlavlarnı inkâr ete ve Donbassta olsa bile, rusiyeli «göñülliler» bardır, dey. BMTniñ malümatına köre, çatışma esnasında 10 300-den ziyade kişi elâk oldı.
Ekinci Minsk añlaşmaları 2015 senesi fevralniñ 12-nde imzalanğan edi. 2014 senesi sentâbr ayında, tabir caiz ise «Minsk-1» denilgen añlaşma imzalanğan edi ve vesiqa çatışma tarafdarlarını, añlaşmanıñ şartlarını yerine ketirmege mecbur etmek kerek edi. Tahminlerge köre, diger barışıq añlaşmaları 2015 senesiniñ soñuna qadar vaziyetni bütünley çezer dep tüşünilgen edi, ancaq 13 maddeniñ iç birisi yetine ketirilmedi, ateşkes ve silâlarnı telükesiz mesafege çekülüvi qısmen yapıldı, dep qayd ete çatışma tarafdarları ve mustaqil közeticiler.
Rusiye Minsk añlaşmalarınıñ yerine ketirilmesiniñ yalıñız bir «kefili» olğanını beyan ete.
