Rusiye tış işleri naziri Sergey Lavrov, Rusiyeni tenqit etken ğarp siyasetçilerini ilhaq etilgen Qırım ya da Suriyeniñ kimyeviy ücümlerge oğrağan rayonlarını ziyaret etmege çağırdı. Böyle bir beyanatnı Lavrov fevralniñ 13-nde Belçika MİDiniñ yolbaşçısı Didiyer Reindersnen yapqan körüşüvinden soñ keçirilgen matbuat konferentsiyasında beyan etti. Rusiye MİDi yolbaşçısı yapqan çıqışınıñ tolu metni Rusiye tış siyaset nazirliginiñ saytında derc etilgendir.
Lavrovnıñ sözlerine köre, «ketken sayın ğarp siyasetçileriniñ çoqusı, şu cümleden Belçika ve Avropa Birligi devletleriniñ deputatları Qırım ve Aqyarnı ziyaret etmekte».
O, dünyada Qırımnen bağlı fikirler ve Suriye kimyeviy silânı kim qullandı degen sualge berilgen cevapta, «uzaq mesafe qullanıla», dep qayd etti.
«Er şeyni öz közüñiznen körip, söz yürsetilgen yerge barıp manzarağa nazar atılması, kerçeknı kösterir edi. Eger Suriyede kimyeviy silâ qullanılğanı aqqında söz yürsetecek olsaq, sahte videoğa tayanmastan, vaqia olıp keçken yerge barmaq kerek. Eger Qırımda uquq bozulamı degen laf yürsetilse, ayrı devletler tarafından, elbette, şu cümleden Ukraina yolbaşçıları qullanğan uydurmalarğa qulaq asmadan, Qırımğa barmaq kerek», – dep beyan etti Lavrov.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
