Link açıqlığı

Saatnıñ esas haberi

Amzayev: «Rusiye ükümeti «Hizb ut-Tahrirnen» alâqalı yasaqnı Qırımdaki siyasiy taqipler içün qullana»


Ukrainadaki «Hizb ut-Tahrir» informatsion ofisiniñ yolbaşçısı Fazıl Amzayev, Rusiye ükümeti işbu teşkilâtnı yasağını devlet içinde ve ilhaq etilgen Qırımda taqipler yapmaq maqsadınen qullanmaqta dep saya. Bu aqta o fevralniñ 7-nde Qırım.Aqiqat Radiosı efirinde ayttı.

«Teşkilâtımız 60 yıllıq tarihke saip, amma bu zaman içinde er kes, bizler yalıñız siyasiy ve mefküreviy iş alıp barğanımıznı, em de zorbalıqsız usullar qullanğanımıznı añlamaq kerek edi. Bir çoq halqara, atta rusiyeli ekspertler bile bunı pek yahşı bile. Buña baqmadan Rusiye 2003 senesinde başlap, 15 yıldan berlibiznen küreşe. Buña beñzer cinaiy işler ve mahkemeler Rusiyeniñ diger vilâyetlerinde daima keçip tura, em de insanlarnı pek uzun, 17 yılğace qapaylar. Ekseriy allarda hususan musulman teşkilâtları zarar köre, Qırımda ise qırımtatarlarnı taqip eterek bütün ealini, şu cümleden ruslarnı da qorquzmağa tırışalar», – dedi 0.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG